Det var eit svært einøygd syn Anndi L. Jakobsen gjer seg til talskvinne for i innlegget «Okkupasjonen som endrar landet» i Vårt Land den 5. november. Påstandane om israelsk valdsferd mot palestinarane er ikkje truverdig dokumenterte, - og oftast når slik valdsferd vert granska, syner det seg at israelarane var i sin gode rett og hadde lovleg grunn når stygge motaksjonar vert iverksette.
Jakobsen nemner at for to år sidan vart ei brannbombe kasta inn i eit hus og fire personar vart drepne. Ille. Men kva med alle dei hundretals ballongar lasta med faklar og brannbomber som daglegdags vert sleppte inn over Sør-Israel i vestavinden og har sett fyr på tusenvis av mål med beiteland og uhausta åkrar? Og alle dei hundretals av livsfarlege rakettar som er skotne ut frå Gaza inn over Israel – med både dødsoffer og store materielle skadar?
Jakobsen nemner to gonger «Palestina» som om det var ein stat med det namnet. Men det er ei tendensiøs forfalsking – for det finst ingen stat som heiter Palestina. Derimot skjer desse hendingane i Judea, innanfor grensene til den internasjonalt aksepterte staten Israel, – og Judea har vore namnet i tusenvis av år, - og som betyr «landet åt jødane».
«- i eit Jerusalem som det nesten ikkje er kristne att», skriv Jakobsen. Heilt usant. Tvert om. Jerusalem og Israel er einaste områda der kristne i er i aukande tal – og den einaste plassen i Midtausten der kristne er trygge.